巴基斯坦 - 最勇敢的事竟然再一次去化妝set 頭 （婚禮終極篇男家reception day )
正式婚禮的第二晚係男家請客嘅reception day ，那日下午兩點幾女主人問我一陣我去化妝你去嗎？ 我問佢今日都要好隆重？ 佢話昨日化完妝影相效果又好似唔同左，而且咁平都係去化😝佢咁講完我又心大心細，於是我用左一分鐘又做左人生中一個比起去阿富汗同敘利亞更大膽嘅決定，就係又喺巴基斯坦化妝set頭！之所以講大膽係因為我要冒險隨時變做阿梅之外其實佢哋嘅衞生意識較低，那個用來化妝無數次嘅粉樸無見佢有消毒過，仲有果堆化妝掃又係都唔知幾耐無消毒過，真係諗起都驚！所以我覺得自己再去多次都幾搵命博！
話說果日比較晏六點先去到，裡面已經坐左二十個女人在等扮靚，婚禮旺季生意特別好，化妝師在自己屋企做呢門生意真係好好賺。二十幾人當中就見到新娘嘅媽媽同兩個妹，見到面就當然又要打招呼啦，只見佢哋三個個樣攰到呢！佢哋三個攰到坐喺度都瞓得著，就好似啲明星拍左幾晚通宵戲咁！ 等埋位之前休息。原來佢哋係會攰咖！ 以為佢哋真係咁捱得！話曬舉行左咁多日婚禮活動唔攰就假！
由於人太多，真係等左幾耐先到我哋，果晚負責set 頭姐姐幫我整左個陳寶珠style(粵語長片），化埋妝已經成八點幾，好明顯太多人，化妝姐姐無好似前一日咁幫我起勢咁打個鼻影，條眉我都覺得佢畫左幾次都唔對稱！成個過程都好趕呀因為婚禮其實九點開始！不過新娘媽媽同妹妹都未整完，我哋嗱嗱聲走先，因為我仲要回去攞相機，女主人都要番去催逼三兄弟換衫😝
十點才到達婚禮場地，巴基斯坦時差真係遲一個鐘係好正常，新娘的家人也未到，應該係化妝都搞左好耐。當晚由於係男家宴客，所有男賓客都換上西裝出席，相比起正式婚禮當晚女士們也是比較無咁閃！
而當晩都係影相、食下自助餐等，沒有太多儀式，而且當晚燈光效果好暗，我都唔係影左好多相！連日來同一班賓客出席了咁多活動其實大家應該也真心覺得攰！
好哪，終於完了，唔駛再過一起身就去扮靚然後玩到半夜甚至天光的日子！ 我開始感受到成日去ball 或者明星要扮靚去宣傳活動其實係好辛苦嘅事！
放心，我仍然係寫旅遊的，化妝美容唔會再講😝下一篇會解開究竟一對新人係被安排婚姻定自由戀愛呢個疑團⋯密切留意啊😊
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
Search